အရသာပြည့်စုံတဲ့ အုန်းနို့ခေါက်ဆွဲတစ်ပွဲ ဘယ်လို ချက်မလဲ

အရသာပြည့်စုံတဲ့ အုန်းနို့ခေါက်ဆွဲတစ်ပွဲ ဘယ်လို ချက်မလဲ

30 မိနစ်

5 ဦးစာ

ခက်ခဲသော

အုန်းနို့၊ သံပရာသီးနဲ့ ကြက်သွန်စိမ်းနံ့လေးတွေ ရောစပ်ပြီးရရှိလာတဲ့ အုန်းနို့ခေါက်ဆွဲနံ့မွှေးမွှေးလေးကို တွန်းလှန်နိုင်သူမရှိလောက်ဘူးထင်ပါတယ်နော်။ တော်တော်များများက အုန်းနို့ခေါက်ဆွဲကိုနှစ်သက်ကြပေမယ့် အိမ်မှာတော့ ကိုယ်တိုင်ချက်မစားဖြစ်ကြပါဘူး။ အခု အနံ့၊အရသာနဲ့ပြည့်စုံတဲ့ အုန်းနို့ခေါက်ဆွဲတစ်ပွဲဘယ်လိုချက်မလဲဆိုတာ ရိုးရိုးရှင်းရှင်းပြောပြပေးချင်ပါတယ်။

ပါဝင်ပစ္စည်းများ

  • ခေါက်ဆွဲဖတ် ၃၀ ကျပ်သား
  • ကြက်သား (အရိုး၊ အသားရောလျက်) ၂၀ ကျပ်သား (ရေဆေးပြီး အတုံးအနေတော်တုံးကာ ခနောကြက်သားမှုန့်နဲ့နယ်ထားပါ)
  • ချင်း ၁ စင်တီမီတာ (ထောင်းထားပါ)
  • ကြက်သွန်နီ ၂ လုံး (ထောင်းထားပါ)
  • ကြက်သွန်ဖြူ ၄ မြွှာ (ထောင်းထားပါ)
  • ဆီ ထမင်းစားဇွန်း ၄ ဇွန်း
  • ငရုတ်သီးအရောင်တင်မှုန့် ထမင်းစားဇွန်း ၁ ဇွန်း
  • နနွင်းမှုန့် လက်ဖက်ရည်ဇွန်း ၁ ဇွန်း
  • ခနောကြက်သားမှုန့် ထမင်းစားဇွန်း ၂ ဇွန်း အသားနယ်ရန်နဲ့ ဟင်းရည်ထဲထည့်ရန် တစ်ဝက်စီသုံးပါ)
  • ဆား လက်ဖက်ရည်ဇွန်း ၃ ဇွန်း
  • သကြား ထမင်းစားဇွန်း ၁ ဇွန်း
  • ပဲစိမ်းမှုန့် ၇၅ ဂရမ် (ရေ ၁၀၀၀ မီလီလီတာနဲ့ရောကာ မီးအေးအေးနဲ့ဖြည်းဖြည်းချင်းမွှေကာကျိုထားပါ)
  • အုန်းနို့ ၄၀၀ မီလီလီတာ (တစ်ဝက်ကို ဆီသတ်ချိန်ထည့်ပြီး ကျန်တစ်ဝက်ကိုဟင်းရည်ဆူမှထည့်ပါ)
  • ရေ ၁၀၀၀ မီလီလီတာ (ပဲရည်ကျိုရန်)
  • ကြက်ဥပြုတ် ၃ လုံး (မထူမပါးစိတ်ထားပါ)

ထည့်စားရန်

  • ကြက်သွန်နီ ၂ လုံး (ပါးပါးလှီးပြီး ရေဆေးကာစစ်ထားပါ)
  • မုန့်ကြွပ်ကြော် ပန်းကန်လုံး ၁ လုံး
  • ငရုတ်သီးလှော် ထမင်းစားဇွန်း ၂ ဇွန်း (လိုသလောက်သာ ထည့်စားပါ)
  • သံပုရာသီး ၂ လုံး (အစိတ်လေးများ စိတ်ထားပါ)

ချက်ပြုတ်ပြင်ဆင်ပုံ

  1. အရင်ဆုံးကြက်သားချက်ပါမယ်။ ဒယ်အိုးထဲကို ဆီထည့်ပြီးဆီဆူလာချိန်မှာ ကြက်သွန်ဖြူ၊ကြက်သွန်နီ၊ချင်းထည့်ပါ။ ငရုတ်သီးအရောင်တင်မှုန့်၊ နနွင်းမှုန့်ထည့်ကာဆီသတ်ပါ။

  2. ဆီသတ်နံ့မွှေးလာချိန်မှာ ကြက်သားထည့်ပါ။ကြက်သားအရည်လေးထွက်ပြီး မွှေးလာချိန်မှာ အုန်းနို့လောင်းထည့်ကာ ဆက်မွှေပေးပါ။အဖုံးလေးခဏအုပ်ပြီး ဆီပြန်လာအောင်ထားပေးပါ။

  3. ကြက်သားနဲ့ အုန်းနို့နံ့လေးမွှေးပြီး ဆီပြန်လာပြီဆိုရင် ကျိုထားတဲ့ပဲရည်ကို ဖြည်းဖြည်းချင်းလောင်းထည့်ကာမွှေပေးပါ။ ဆက်တိုက်မွှေပေးပြီး ဟင်းအရည်ပွက်လာချိန်မှာ ချန်ထားခဲ့တဲ့အုန်းနို့ကို လောင်းထည့်ပါ။

  4. ဟင်းရည်ပွက်လာရင် သကြား၊ ခနောကြက်သားမှုန့်၊ ဆား၊ ကြက်ဥပြုတ်ထည့်ကာ မိမိလိုသလောက်အပျစ်အကျဲရအောင် ဆက်တည်ထားပါ။ အရေးအကြီးဆုံးအချက်က ဟင်းအိုးဘေးမှာနေပြီး မွှေပေးနေဖို့ဖြစ်ပါတယ်။ အပေါ်ယံမှာဝေ့တက်လာတဲ့အဆီတွေကိုလည်း သတ်ချပေးနေဖို့လိုပါတယ်။

  5. ခုဆိုရင်တော့ အနံ့အရသာနဲ့ပြည့်စုံတဲ့ အုန်းနို့ခေါက်ဆွဲလေးကို အလွယ်တကူပဲချက်ပြီးသွားပါပြီ။

 
         

သူငယ်ချင်းမိတ်ဆွေများနှင့် မျှဝေလိုက်ပါ

AddThis is disabled because of cookie consent