လွယ်ကူမြန်ဆန်ပြီး အရသာရှိတဲ့ ငါးဖယ်အုန်းနို့ချက်

ပထမဆုံး ငါးဖယ်ခြစ်ကို ခနော ကြက်သားမှုန့်၊ ကြက်သွန်ဖြူ၊ နနွင်းမှုန့်တို့ဖြင့် ရောနယ်ပြီး အရသာသွင်းပါ။ ပြီးလျှင် ၁မိနစ်ခန့် ကြော်ပါ။

ငါးဖယ်ကြော်ရရင် ပန်းကန်တစ်လုံးထဲ ပြောင်းထည့်ထားပါ။ ခရမ်းချဉ်သီး(ကိုင်းသီး) ကို ညက်အောင် ကြိတ်ပါ။ ငရုတ်သီးနှင့် နံနံပင်တို့ကို ရေစိမ်ထားပါ။

ကြက်သွန်ဖြူ၊ ကြက်သွန်နီနဲ့ ငရုတ်ပွခြောက်တို့ကို ကြေညက်အောင် ထောင်းပြီး ဟင်းအနှစ် လုပ်ထားပါ

ပြီးရင်တော့ ဒယ်အိုးကို အပူပေးပြီး နံနံပင်အရိုး၊ နနွင်းမှုန့်၊ စပါးလင်၊ အသင့်ထောင်းထားတဲ့ ငရုတ်သီး အနှစ်တို့ကို ရောမွှေပြီး ဆီသတ်ပါ။

ငရုတ်သီးအနှစ်တွေ ကျက်သွားရင်တော့ အသင့်ကြိတ်ထားတဲ့ ခရမ်းချဉ်သီးကို ထည့်ပြီး ချက်ပါ။ ဆီပြန်လာရင် အုန်းနို့ကိုထည့်ပြီး မွှေပေးပါ။ အုန်းနို့ဆီပြန်လာရင်တော့ အသင့်ကြော်ထားတဲ့ ငါးဖယ်ကို ထည့်ချက်ပါ။

ငါးဖယ်ဆီပြန်လာရင် ရေသန့် အနည်းငယ်ထည့်ပြီး ခနောကြက်သားမှုန့်၊ ငါးငံပြာရည်၊ ငရုတ်ကောင်းမှုန့် တို့နဲ့ လိုသလို အရသာထိန်းပြီး ချက်ပါ။

ကျက်သွားတဲ့အခါ ပန်းကန်ထဲပြောင်းထည့်ပြီး ငရုတ်သီးစိမ်း၊ နံနံပင်တို့အုပ်ပြီးတဲ့ အချိန်မှာတော့ အရသာရှိပြီး ထမင်းမြိန်စေမယ့် ငါးဖယ် အုန်းနို့ချက်ဟင်းလေး ရသွားပါပြီနော်။ တစ်မျိုးထဲနဲ့ကောင်းလွန်းလို့ အရံဟင်းတောင်မလိုပဲ ဟင်းတစ်မျိုးထဲနဲ့ စားရင်တောင် အရသာရှိတဲ့ ထမင်းဝိုင်းလေး ဖြစ်စေမှာပါနော်။