မိုးအေးအေးမှာနွေးထွေးသွားစေမယ့် ရှူးရှဲချဉ်စပ်ကြက်ကချင်ချက်လေး

မိုးလေးကတဖြောက်ဖြောက် ရာသီဥတုကအေးအေးလေးဆိုတော့ အိမ်ထဲမှာပဲကွေးနေချင်စရာနော်။ အစ်မကတော့ မိုးတွင်းဆိုဈေးခဏခဏမသွားဘဲ အိမ်သားတွေအတွက်တစ်ပတ်စာ အသား၊ငါး၊ အသီးအရွက်အကုန်ဝယ်ထားပြီး တစ်နေ့တစ်မျိုးမရိုးရအောင်ချက်တယ်။ ဒီနေ့တော့ရေခဲသေတ္တာထဲက ကြက်သားတစ်ဆယ်သားလောက်ကိုထုတ်ပြီး မိုးရာသီနဲ့လိုက်ဖက်အောင် ချဉ်ချဉ်စပ်စပ်ကြက်သားဟင်းလေး ချက်မယ်လို့စိတ်ကူးထားတယ်။ ကြက်သားကို ဆီပြန်ချက်ရတာ၊ အာလူးနဲ့ရောတာတွေကလည်း ရိုးအီလာတော့ ဒီတစ်ခါ မိုးအေးအေးမှာ ရှုးရှဲချဉ်ချဉ်စပ်စပ်လေးနဲ့စားကောင်းတဲ့ ကြက်ကချင်ချက် (Kachin Chicken Curry) လေးချက်ဖို့ပဲပြင်ဆင်လိုက်တော့မယ်။ ငယ်ငယ်က တရှူးရှူးတရှဲရှဲနဲ့မောင်နှမတွေ လုစားခဲ့ရတာသတိရမိသေး။ ကြက်ကချင်ချက်ဆိုရင် လူကြီးလူငယ်တော်တော်များများကြိုက်ကြပြီး ထမင်းမြိန်စေတဲ့အပြင် ချက်ပြုတ်ပြင်ဆင်ရတာလည်း လွယ်ကူတာမို့ အိမ်ရှင်မတိုင်းနှစ်ခြိုက်တဲ့ ဟင်းတစ်မယ်လည်း ဖြစ်မှာမို့ တူတူချက်ကြည့်ကြစို့နော်။