မိသားစုထမင်းပွဲတွေအတွက် မပါမဖြစ် ၁၂ မျိုးဟင်းချိုတစ်ခွက်

မိသားစုထမင်းပွဲတွေအတွက် မပါမဖြစ် ၁၂ မျိုးဟင်းချိုတစ်ခွက်

40 မိနစ်

5 ဦးစာ

အလယ်အလတ်

မိသားစုထမင်းဝိုင်းမှာ ထမင်းမြိန်မြိန်စားကောင်းဖို့ဆိုရင် ဟင်းချိုတစ်ခွက်တော့မဖြစ်မနေပါဝင်သင့်ပါတယ်။ ဟင်းချိုဟင်းတွေအများကြီးရှိတဲ့ထဲကမှ အဓိကဟင်းပွဲတစ်ပွဲလိုမျိုး တန်ဖိုးလည်းရှိ၊ လူကြိုက်လည်းများပြီး မိသားစုထမင်းပွဲတွေအတွက်မပါမဖြစ်ရှိနေတာကတော့ ၁၂ မျိုးဟင်းချိုပဲဖြစ်ပါတယ်။ ၁၂ မျိုးဟင်းချိုတစ်ခွက်မှာ အသား၊ဥ၊အသီးအရွက်တွေ စုံစုံလင်လင်ပါဝင်တာမို့ အာဟာရပြည့်ဝတဲ့အပြင် ချက်ပြုတ်ရတာလည်း လွယ်ကူမြန်ဆန်ပါတယ်။

ပါဝင်ပစ္စည်းများ

  • ကြက်သားပေါင်သား ၃၀ ကျပ်သား (ရေဆေးသန့်စင်ပြီး အတုံးသေးတုံးကာ နနွင်း၊ ခနောကြက်သားမှုန့်နဲ့နယ်ထားပါ)
  • မုန်လာဥနီသေး ၁ ဥ (ရေဆေးသန့်စင်ပြီး နှစ်သက်သလိုလှီးထားပါ)
  • တရုတ်မုန်ညင်း ၃ ဖတ် (ရေဆေးပြီး ၃ စင်တီမီတာအရွယ်လှီးထားပါ)
  • မုန်ညင်းစိမ်း ၁ စည်း (ရေဆေးပြီး ၃ စင်တီမီတာအရွယ်လှီးထားပါ)
  • ဂေါ်ဖီပန်းပွင့် ၁/၂ ခွက် (ရေဆေးပြီး မကြီးမသေးဖဲ့ချွေထားပါ)
  • ရွှေပဲသီး ၆ ခု (ရေဆေးအကြောသင်ပြီး မကြီးမသေးလှီးထားပါ)
  • ပဲပြား ၁ တုံး (အတုံးလေးများ တုံးထားပါ)
  • ဂျပန်တို့ဟူးဝါ ၁ ထုပ် (မထူမပါးလှီးထားပါ)
  • ငရုတ်ပွသီးစိမ်း ၁ လုံး (ရေဆေးပြီး လှီးထားပါ)
  • ငုံးဥ ၁၀ လုံး (ပြုတ်ထားပါ)
  • ငါးဖယ်လုံး ၁၀ လုံး
  • ကြက်ဥ ၁ လုံး (ညက်နေအောင် ခေါက်ထားပေးပါ)
  • တရုတ်နံနံ ၂ ပင် (ရေဆေးထားပါ)
  • ရေ ၆ခွက်ခွဲ (၁၆၀၀ မီလီလီတာ)
  • ကြက်သွန်ဖြူ ၄ မွှာ (မညက်တညက်ထောင်းထားပါ)
  • ချင်း ၃ စင်တီမီတာ (မညက်တညက်ထောင်းထားပါ)
  • နနွင်းမှုန့် လက်ဖက်ရည်ဇွန်းတစ်ဝက်
  • ခနောကြက်သားမှုန့် ထမင်းစားဇွန်း ၁ ဇွန်း (တစ်ဝက်ကိုအသားနယ်ရန်၊ တစ်ဝက်ကို ဟင်းရည်ထဲခတ်ရန်)
  • ဆီ ထမင်းစားဇွန်း ၁ ဇွန်း
  • ပဲငံပြာရည်အကြည် ထမင်းစားဇွန်း ၁ ဇွန်း
  • ပဲငံပြာရည်အနောက် ထမင်းစားဇွန်း ၁ ဇွန်း

ချက်ပြုတ်ပြင်ဆင်ပုံ

  1. အိုးထဲကို ဆီထည့်ပြီးဆီပူလာတဲ့အခါ ကြက်သွန်ဖြူ၊ချင်း၊ကြက်သားထည့်ကာ ခဏမွှေပေးပါ။

  2. ကြက်သားမွှေးပျံ့လာတဲ့အခါ ရေထည့်ပြီး ဆူအောင်တည်ပါ။ ရေဆူလာချိန်မှာ ငါးဖယ်လုံးကိုထည့်ပါ။

  3. ကြက်သားပြုတ်ရည်ကျက်လာပြီ၊ အသားနူးပြီဆိုရင် ပဲငံပြာရည်နှစ်မျိုးကိုထည့်မွှေပေးလိုက်ပါ။ ပြီးရင် ပဲပြားကိုထည့်ပါမယ်။

  4. ၁ မိနစ်ခန့်ကြာတဲ့အခါ ကျန်နေတဲ့အသီးအရွက်၊ ဂျပန်တို့ဟူး၊ ငုံးဥ စတဲ့ပါဝင်ပစ္စည်းအားလုံးကိုထည့်ရပါမယ်။

  5. အရသာအပေါ့အငန်မြည်းပြီး ချိုချိုလေးလေးကြိုက်ရင် ခနောကြက်သားမှုန့်ထပ်ထည့်ပေးနိုင်ပါတယ်။ အသီးအရွက်တွေကျက်ပြီဆိုရင်တော့ ကြက်ဥရည်ဆမ်းပါ။

  6. ကြက်ဥအရည်ဆမ်းချနေချိန် ဟင်းချိုအိုးကိုဖြည်းဖြည်းမွှေပေးနေရပါမယ်။ ကြက်ဥမျှင်လေးတွေရသွားပြီဆိုရင်တော့ တရုတ်နံနံလေးထည့်ကာ ခပ်ယူသုံးဆောင်နိုင်ပြီဖြစ်ပါတယ်။

 
         

သူငယ်ချင်းမိတ်ဆွေများနှင့် မျှဝေလိုက်ပါ

AddThis is disabled because of cookie consent