ထားဝယ်စတိုင် ဝက်လက်နှင့် နာနတ်သီးချက်

ထားဝယ်စတိုင် ဝက်လက်နှင့် နာနတ်သီးချက်

45 မိနစ်

3 ဦးစာ

အလယ်အလတ်

ဒီတစ်ခေါက်မှာတော့ ဟင်းလျာအသစ်အဆန်းလေးတွေ ချက်စားရတာကြိုက်တဲ့ အိမ်ရှင်မတို့အတွက် ဝက်လက်နူးနူးအိအိလေးကို နာနတ်သီးနဲ့ချက်နည်းလေးကို မိတ်ဆက်ပေးချင်ပါတယ်။ ဝက်လက်စားလို့ အီတဲ့အရသာကို နာနတ်သီးလေးနဲ့ ထိန်းညှိပေးနိုင်တာမို့ မိသားစုတွေလည်း အကြိုက်တွေ့မယ့် ဟင်းတစ်ခွက် ဖြစ်စေမှာပါ။

ပါဝင်ပစ္စည်းများ

  • ဝက်လက်သား ၆၂.၅၀ ကျပ်သား
  • ကြက်သွန်နီ ၂ လုံး
  • ကြက်သွန်ဖြူ ၁၀ တက်
  • ချင်း ၅ ကျပ်သား
  • ငရုတ်ကောင်းမှုန့် လက်ဖက်စားဇွန်း ၁ ဝက်
  • ခနောကြက်သားမှုန့် ထမင်းစားဇွန်း ၃ ဇွန်း
  • သကြား ထမင်းစားဇွန်း ၂ ဇွန်း
  • နနွင်းမှုန့် လက်ဖက်စားဇွန်း ၁ ဇွန်း
  • လေးညှင်းပွင့် ၃ ပွင့်
  • ငံပြာရည် ထမင်းစားဇွန်း ၁ ဇွန်း
  • နံနံပင် အနည်းငယ်
  • နာနတ်သီး ၁ လုံး
  • ကင်မွန်းချဉ်ရွက် ၁ စည်း
  • ငရုတ်သီးစိမ်း ၁၀ တောင့်
  • ရေသန့် ၄ လီတာ

ချက်ပြုတ်ပြင်ဆင်ပုံ

  1. အရင်ဦးဆုံး ဝက်လက်သားလေးတွေကို သန့်စင်ပြီး အကွင်းလိုက်လှီးထားပါ။

  2. နာနတ်သီးလေးတွေကိုလည်း အခွံခွာသန့်စင်ပြီး အကွင်းလိုက်လေးတွေ လှီးထားပေးပါနော်။

  3. ချက်မယ့်အိုးထဲမှာ ကြက်သွန်နီ၊ ကြက်သွန်ဖြူ၊ ချင်း၊ နနွင်းမှုန့်၊ ငရုတ်ကောင်းမှုန့်၊ ခနောကြက်သားမှုန့်၊ သကြား၊ လေးညှင်းတို့ထည့်ပြီး ဆူတဲ့အထိ တည်ထားပေးပါ။

  4. ဟင်းခတ်အမွှေးအကြိုင်များတည်ထားတဲ့ အရည်များပွက်ပွက်ဆူလာတဲ့အခါ အသင့်လှီးထားတဲ့ ဝက်လက်သားနဲ့ နာနတ်သီးကိုထည့်ပြီး ချက်ပေးပါ။

  5. အရသာအတွက် ခနောကြက်သားမှုန့်၊ ငံပြာရည်တို့ထည့်ပြီး အပေါ့အငန်မြည်းကြည့်ကာ လိုအပ်ရင်ထပ်ထည့်နိုင်ပါတယ်နော်။

  6. မိနစ်အနည်းငယ်ကြာလာရင်တော့ ကင်မွန်းချဉ်ရွက်လေးတွေထည့်ပြီး (၁၅)မိနစ်ခန့် ချက်ထားပေးပါ။

  7. ဝက်လက်သားလေးတွေလည်းနူးအိလာပြီး အရည်လေးလည်းခမ်းလာပြီဆိုရင်တော့ ငရုတ်သီးစိမ်း၊ နံနံပင်လေးတွေအုပ်ပြီး အရသာရှိစွာ သုံးဆောင်နိုင်ပါပြီ။

 
         

သူငယ်ချင်းမိတ်ဆွေများနှင့် မျှဝေလိုက်ပါ

AddThis is disabled because of cookie consent