ငရုတ်ပွကို ဝက်သား၊ ငါးပုတ်ခြောက်လေးနဲ့ အစာသွပ်စားမယ်

အရင်ဦးဆုံး ဝက်ဂုတ်လိုင်းသားလေးတွေကို နုတ်နုတ်စင်းပြီး ငါးပုတ်ခြောက်လေးတွေကိုတော့ အရေခွံဖယ်ပြီး လှီးဖြတ်ထားပေးပါ။ ငရုတ်ပွလေးတွေကိုတော့ အစေ့ထုတ်ထားပါ။

အသင့်လှီးထားတဲ့ ဝက်ဂုတ်လိုင်းသားလေးတွေနဲ့ ငါးပုတ်ခြောက်လေးတွေကို အရသာဝင်သွားအောင် ခနောကြက်သားမှုန့်၊ ငရုတ်ကောင်းမှုန့်တို့နဲ့ နယ်ကာ မိနစ် (၂၀)ခန့် နှပ်ထားပေးပါ။

ကြက်သွန်ဖြူ၊ ကြက်သွန်နီ၊ ချင်းနဲ့ ငရုတ်ပွခြောက်လေးတွေကိုတော့ ဆီသတ်ဖို့အတွက် ညက်နေအောင် ထောင်းထားပေးပါနော်။

ဒယ်အိုးထဲမှာ ဆီထည့်ပြီး ဆီပူလာရင်တော့ ထောင်းထားတဲ့ ငရုတ်နှစ်လေးတွေကို နနွင်းမှုန့်၊ နံနံပင်အရိုးတို့နဲ့အတူ ဆီသတ်ပေးပါ။

ဆီသတ်နံ့လေးမွှေးလာပြီး ကြက်သွန်လေးတွေလည်း နွမ်းလာပြီဆိုရင်တော့ ဝက်ဂုတ်လိုင်းသားနဲ့ ငါးပုတ်ခြောက်လေးတွေ ထည့်ချက်ပေးပါနော်။

ဝက်ဂုတ်လိုင်းသားလေးတွေနဲ့ ငါးပုတ်ခြောက်လေးတွေ ကျက်သွားပြီဆိုရင်တော့ ငရုတ်ပွသီးလေးတွေထဲ အစာသွပ်ပေးပါ။

အစာသွပ်ထားတဲ့ ငရုတ်ပွသီးလေးတွေကို ရေသန့်အနည်းငယ်နဲ့ အနည်းငယ်ကျက်သည်အထိ ချက်ပေးပါနော်။

ငရုတ်ပွသီးလေးတွေ ကျက်လာပြီဆိုရင်တော့ ငရုတ်သီးစိမ်းနဲ့ နံနံပင်လေးအုပ်ပြီး အရသာရှိစွာ သုံးဆောင်နိုင်ပါပြီ။