ချဥ်ချဥ်စပ်စပ် ထိထိမိမိနဲ့ တုန်ယမ်းပဲပြားဟင်းတစ်ခွက်

နုပ်နုပ်စဥ်းထားသော ဝက်သားများကို ဆား၊ သကြား နှင့် ပဲငံပြာရည်အကြည်များနှင့် နယ်ကာ အနည်းဆုံး ၁၅ မိနစ်ခန့် အရသာနှပ်ထားပါ။

ပဲပြားများကို ၁ လက်မအရွယ် အတုံးလေးများ ဖြစ်အောင် လှီးထားပေးပါ။

ဒယ်အိုးထဲတွင် ပဲပြား မြုပ်ရုံ ဆီထည့်ပြီး ပဲပြားများကို အပြင်အကာတင်းပြီး ရွှေရောင်စသမ်းလာသည်အထိ ဟိုဘက်သည်ဘက် လှန်ကာ ကြော်ပေးပြီး ဆီစစ်ထားပါ။

ဒယ်အိုးထဲတွင် ဆီ ထမင်းစားဇွန်း ၂ ဇွန်းစာခန့်ချန်ပြီး ကြက်သွန်ဖြူများကို ဆီသတ်ပါ။

ကြက်သွန်ဖြူမွှေးလာလျှင် အရသာနှပ်ထားသော ဝက်သားများကို ထည့်ကာ ဝက်သားများ ကြေအောင် ဇွန်းဖြင့် အနည်းငယ်ဖိခြေပြီး မွှေကြော်ပေးပါ။ ထို့နောက် နုပ်နုပ်စဥ်းထားသော ငြုပ်သီးအနီများကိုပါ ထည့်ပြီး အနံ့မွှေးလာသည်အထိ သမအောင် မွှေကြော်ပေးပါ။

ပြီးလျှင် Knorr တုန်ယမ်းအရသာခဲများကို ထည့်ပေးပါ။ ငြုပ်သီးအရောင်တင်မှုန့်ကိုလည်း ထည့်လိုက်ပြီး တုန်ယမ်းအရသာခဲများ ပျော်ဝင်ပြီး ဝက်သားများနှင့် အရသာနှံ့သွားအောင် မွှေကြော်ပေးပါ။ အသားများကျက်သွားစေရန် ရေကို အသား မမြုပ်တမြုပ်ပမာဏ ထည့်ပြီး ၃ မိနစ်ခန့် ဆက်ချက်ပေးထားပါ။

အသားချက်ထားသည့်ရေ အနည်းငယ် ကျန်နေသည့်အနေအထားတွင် ကော်မှုန့်များကို ရေအနည်းငယ်ဖြင့်ဖျော်ကာ လောင်းထည့်ပြီး မွှေပေးလိုက်ပါ။

ပြီးလျှင် ကြော်ထားသော ပဲပြားများကိုပါထည့်ပြီး အသားများနှင့် သမသွားအောင် ရောမွှေပေးလိုက်ပါ။

နောက်ဆုံးတွင် ကြက်သွန်မြိတ်များကိုပါ ဖြူးပေးလိုက်ပါက မွှေးမွှေးစပ်စပ်လေးနှင့်ထမင်းမြိန်စေမည့် တုန်ယမ်းပဲပြားချဥ်စပ်ချက်လေးကို သုံးဆောင်နိုင်ပြီ ဖြစ်ပါသည်။