ခပ်ဆန်းဆန်းအမဲခါးဆစ်သားနှပ်လေးချက်မယ်

ခပ်ဆန်းဆန်းအမဲခါးဆစ်သားနှပ်လေးချက်မယ်

45 မိနစ်

4 ဦးစာ

လွယ်သော

အမဲခါးဆစ်သားနုနုလေးကို ကျွန်တော်က ခါတိုင်းချက်နေကျပုံစံမဟုတ်ဘဲ အနောက်တိုင်းစတိုင်လ်ချက်ကြည့်ဖို့စိတ်ကူးမိတယ်။ အမဲသားကိုအနောက်တိုင်းစတိုင်လ်ပြင်ဆင်ချက်ပြုတ်တာက ခက်မယ်၊အလုပ်ရှုပ်မယ်လို့ထင်ခဲ့ပေမယ့် အခုပြောပြမယ့်ချက်ပြုတ်နည်းလေးကတော့ အရမ်းကိုလွယ်ကူလျင်မြန်ပါတယ်။ အမဲခါးဆစ်သားကို စတိုင်လ်တစ်မျိုးနဲ့ခပ်ဆန်းဆန်းလေးချက်ထားတာမို့ အရသာအသစ်ကိုမြည်းစမ်းချင်တတ်တဲ့ မိတ်ဆွေတွေကိုလည်း ကျွေးဖို့ အမဲခါးဆစ်သားနှပ်ချက်မယ်။

ပါဝင်ပစ္စည်းများ

  • အမဲခါးဆစ်သားနုနု ၃၀ ကျပ်သား (ရေဆေးသန့်စင်ပြီး ၁ လက်မအရွယ်အတုံးလေးများ တုံးထားပါ)
  • သံလွင်ဆီ ထမင်းစားဇွန်း ၁ ဇွန်း
  • ကြက်သွန်နီ ၁ လုံး (အတုံးသေးများလှီးထားပါ)
  • ကြက်သွန်ဖြူ ၃ မြွှာ (နုတ်နုတ်စင်းထားပါ)
  • မုန်လာဥနီအကြီး ၁ လုံး (အခွံနွှာကာအတုံးများတုံးထားပါ)
  • ပဲလုံးစိမ်း(စည်သွပ်ဘူး) ၁ ခွက်
  • တရုတ်နံနံ ၁ ခက် (ရေဆေးထားပါ)
  • ခရမ်းချဥ်သီးအနှစ် ထမင်းစားဇွန်း ၂ ဇွန်း
  • အာလူး ၂ လုံး (အံစာတုံးပုံတုံးထားပါ)
  • ဂျုံမှုန့် ၁ခွက်ရဲ့ လေးပုံတစ်ပုံ
  • အမဲပြုတ်ရည် ၂ ခွက် (စည်သွပ်ဗူးကို သုံးနိုင်ပါတယ်)

ချက်ပြုတ်ပြင်ဆင်ပုံ

  1. အမဲသားကိုဂျူံမှုန့်နဲ့ခပ်ဖွဖွနယ်ပါ။ မီးမပြင်းတပြင်းထားပြီး ချိုးမကပ်ဒယ်အိုးထဲကို သံလွင်ဆီထည့်ပေးလိုက်ပါ။ အမဲသားကိုထည့်လိုက်ပြီး လေးဘက်လုံး အညိုရောင်သန်းလာသည်အထိ အပူပေးပါ။

  2. ခရမ်းချဉ်သီးအနှစ်ထည့်ကာ စက္ကန့်အနည်းငယ်ထပ်မွှေပေးလိုက်ပါ။ ကြက်သွန်နီ၊ ကြက်သွန်ဖြူထည့်ကာဆက်မွှေပေးပါ။

  3. မုန်လာဥနီနဲ့အာလူးထည့်ပြီး အမဲပြုတ်ရည် ၂ ခွက်ကိုလောင်းထည့်ပါ။ မီးအေးအေးနဲ့ မိနစ် ၃၀ ခန့်နှပ်ထားပေးလိုက်ပါ။ မီးမပိတ်ခင် ၅ မိနစ်ခန့်အလိုမှာ ပဲစိမ်းလုံးလေးတွေထည့်ပေးလိုက်ပါ။

  4. ပန်းကန်ထဲခူးပြီးချိန်မှာ တရုတ်နံနံလေးတင်ပြီး အလှဆင်ပေးနိုင်ပါတယ်။

  5. ခုဆိုရင်တော့အမဲခါးဆစ်သားနှပ်လေးကို လွယ်လွယ်ကူကူပဲချက်ပြုတ်ပြီးစီးသွားပါပြီနော်။ အရသာပေါ့ပေါ့နဲ့ နူးအိနေတဲ့ အမဲခါးဆစ်သားကောင်းကောင်းလေးကြိုက်သူတွေအတွက်တော့ ဒီချက်နည်းလေးက အဆင်ပြေစေမှာပါ။

 
         

သူငယ်ချင်းမိတ်ဆွေများနှင့် မျှဝေလိုက်ပါ

AddThis is disabled because of cookie consent